Description:
ކުޑަކުދިންނަށް ކުރާ އެކި ބާވަތުގެ އަނިޔާއާ ގުޅޭ ގިނަ އަދަދެއްގެ މައްސަލަތައް މިނިސްޓްރީ އޮފް
ޖެންޑަރ އެންޑް ފެމިލީއަށް ކޮންމެ މަހަކުވެސް ހުށަހެޅެއެވެ. އަދި މިނިސްޓްރީއަށް ހުށަހަޅާ ކޮންމެ
މައްސަލައަކީވެސް ހާއްސަ ސަމާލުކަމެއް ދީގެން ބަލާ މައްސަލައެކެވެ.
ޖިންސީ، ޖިސްމަނީ އަދި ނަފްސާނީ އަނިޔާއާއިން ކުޑަކުދިން ރައްކާތެރިކުރުމަށް ކުރެވޭނެ އެއްމެ
މުހިއްމު އެއް ކަމަކީ ހޭލުންތެރިކަން އިތުރުކުރުންކަމުގައި ވާތީ، މިނިސްޓްރީ ވަނީ "އަހަން" ގެ
ނަމުގައި ޤައުމީ ކެމްޕޭނެއް އިފްތިތާހުކޮށްފައެވެ. އަދި 2015 ވަނަ އަހަރުން ފެށިގެން 2018 ގެ
އޮކްޓޫބަރު މަހުގެ ނިޔަލަށް މިކެމްޕޭން މެދުވެރިކޮށް ރާއްޖޭގެ އެކި ކަންކޮޅުތަކުގައި ދިރިއުޅޭ ކުދިން
ހޭލުންތެރިކުރުމަށް ގިނަ މަސައްކަތްތަކެއް ވަނީ ކުރެވިފައެވެ.
އަދި މި ފަދަ މައްސަލަތައް ބެލުމުގައި މިނިސްޓްރީގެ ދައުރު ހަރުދަނާކުރުމަށްޓަކައި، ޚާއްސަ
ރައްކާތެރިކަން ބޭނުންވާ ކުޑަކުދިންނަށް ޚިދުމަތް ފޯރުކޮށްދިނުމުގައި ގެންގުޅޭ އުސޫލުތައް
މުރާޖައާކޮށް، މި މަސައްކަތުގައި ހަރަކާތްތެރިވާ ސޯޝަލް ސަރވިސް ވަރކަރުންގެ ޚިދުމަތުގެ
ފެންވަރު ރަނގަޅުކުރުމަށްޓަކައި ތަފާތު ތަމްރީން ޕްރޮގްރާމްތައް މިނިސްޓްރީން ވަނީ ވޭތުވެދިޔަ
އަހަރުތަކުގައި ހިންގާފައެވެ.
ހަމައެއާއެކު، އަނިޔާއިން ކުޑަކުދިން ރައްކާތެރިކުރުމަށް ހަރަކާތްތެރިވާ ދައުލަތުގެ އެކި
މުއައްސަސާތަކަށް ކުރިމަތިވާ ގޮންޖެހުންތައް ދެނެގަނެ، އެކަންކަމަށް އެކަށީގެންވާ ހައްލުތައް
ހޯދޭނެ ގޮތްތަކާ ބެހޭގޮތުން މަޝްވަރާކުރުމަށް 2017 ވަނަ އަހަރު މިނިސްޓްރީން ވަނީ ޤައުމީ
ފެންވަރުގެ މަހާސިންތާއެއް ބާއްވާފައެވެ. އަދި މި މަހާސިންތާއާ ގުޅުވައިގެން، އެކި
މުއައްސަސާތަކުގެ ބައިވެރިވުމާއެކު ކުރިއަށް އޮތް ދެ އަހަރަށް ޤައުމީ ފެންވަރުގެ ޚާއްސަ
އެކްޝަން ޕްލޭނެއްވެސް ވަނީ 2017 ވަނަ އަހަރު އިފްތިތާހުކޮށްފައެވެ. އަދި މި ޕްލޭނާ ބެހޭ
މަޢުލޫމާތު ސީދާ ކުޑަކުދިންނާ ހިއްސާކޮށް، މި ޕްލޭނަށް އެ ކުދިންގެ ޚިޔާލު ހޯދާފައިވާކަން ވެސް
އުފަލާއެކު ފާހަގަކުރަމެވެ.
އަޅުގަނޑުގެ ދުޢާއަކީ ކުޑަކުދިންގެ ޙައްޤުތައް ހިމާޔަތްކުރުމަށާއި، އެކި ބާވަތުގެ އަނިޔާތަކުން ކުދިން
ރައްކާތެރިކުރުމަށް އެއްމެން ގުޅިގެން ކުރާ މަސައްކަތްތަކުގައި ބަރަކާތްލެއްވުމެވެ