Abstract:
ދިވެހިބަހަކީ ބަހެއްގައި ހުންނަންޖެހޭ މުހިންމު ގިނަ ސިފަތަކެއް ހުރި އަމިއްލަވަންތަ ޝަރަފުވެރި ބަހެކެވެ. ދިވެހިބަހުގައި ބޭނުންކުރާ "އޮތުން" މިލަފުޒު ބޭނުން ކުރަނީ އެކަށައަޅާފައިވާ ގަވާޢިދާއި އެއްގޮތަށްތޯ ބެލުމަކީ މި ދިރާސާގެ މަގުސަދެވެ. އެހެންކަމުން އޮތުން މި ލަފުޒު ގަވާޢިދާ ޚިލާފަށް ބޭނުންކުރެވެނީ ކިހާ މިނަވަރަކަށްތޯ ބެލުމަށް ކުރެވުނު މި ދިރާސާއިން ފާހަގަކުރެވުނު ގޮތުގައި ދިވެހި ބަހުގައި ބޭނުންކުރާ އޮތުމަކީ ދިވެހިބަހުގެ ގަވާއިދުގެ ތެރޭގައި ހިމެނޭ ވަރަށް މުހިންމު ބައެކެވެ. އެގޮތުން ދިރާސާގައި ބައިވެރި ކުރެވުނު ކުދިންގެ މެދުގައި ފުރުނު ސާވޭ ފޯމުގެ ނަތީޖާ ދައްކާގޮތުން އެކަށައަޅާފައިވާ ގަވާޢިދުގައި ބޭނުންކުރާ އޮތުން އެކަށައަޅާފައިވާ ގަވާޢިދާ ޚިލާފަށް ބޭނުން ކުރެވެމުންދާކަން ފާހަގަކުރެވުނެވެ. އެކަށައަޅާފައިވާ ގަވާއިދާ، އުސޫލާ، ޚިލާފަށް އޮތުން ބޭނުން ކުރުމަކީ މައްސަލައެއް ކަމުގައި ޤަބޫލުކުރެވެއެވެ. ނަމަވެސް ދިވެހި ބަހުގައި އޮތުން ބޭނުން ކުރާނެ ގޮތްތަކާމެދު ގަވާއިދުފޮތްތަކުގައި ބަޔަންކުރައްވާފައިވާ ގަވާޢިދުތަކާ، އުސޫލުތަކާ މެދު ފުށުއެރުންތަކެއްވާކަން ދިރާސާކުރުމަށްޓަކަ އެއްކުރެވުނު މައުލޫމާތުން ހޯދިގެންދިޔައެވެ. މެތަޑަކީ ކުއަންޓިޓޭޓިވް ޕެރަޑައިމްގެ ދަށުން ކުރިއަށް ގެންދިޔަ މި ދިރާސާ ހެދުމަށްޓަކައި ޑޭޓާ އެއްކުރެވުނީ ސާވޭ ފޯމެއްގެ އެހީގައެވެ. އަދި ސާވޭ ފޯމުން ލިބުނު ނަތީޖާ ނެރެ ދައްކައިދީފައިވާނީ ޗާޓްތަކާ، ގުރާފުތަކުގެ އެހީގައެވެ.