Abstract:
މިއީ ހިސާބުގެ ވިޔަ ޢަދަދުތައް ދިވެހި ބަހުން ބޭނުންނުކުރާ ދިވެހިން، ޚާއްޞަކޮށް ޒުވާނުން މިއަދު ގިނަކަމަށް ފާހަގަކުރެވޭތީއާއި ނަންބަރު ލަފުޒުތައް ނެތެމުންދާކަމަށް ފާހަގަކުރެވިފައިވުމުން، ގުރޭޑް 1ގެ ކުދިންނަށް ނަންބަރު ލަފުޒުތައް ދިވެހި ބަހުން ބުނަން އެނގޭ މިންވަރު ދެނެގަތުމަށާއި މާދަރީބަހުން ގުނުމުގައި މި ކުދިންނަށް މަދަރުސާގެ މާހައުލުން ކުރިމަތިވާ ގޮންޖެހުންތައް ދެނެގަތުމަށް ކުރިޔަށް ދިރާސާއެކެވެ. މި ދިރާސާގައި ބައިވެރިކުރީ މާލޭގެ ސަރުކާރު ސްކޫލްތަކުގެ ގުރޭޑް އެކެއްގައި ތަޢުލީމް ޙާޞިލްކުރާ ދަރިވަރުންގެ ތެރެއިން ސިމްޕަލް ރެންޑަމްކޮށް ހޮވާލެވުނު 100 ދަރިވަރުންނާއި މާލޭގެ ސަރުކާރުގެ ސްކޫލްތަކުގެ ތެރެއިން އިނގިރޭސި މީޑިއަމަށް ކިޔަވައިދޭ ހުރިހައި ސްކޫލެއްގެ، ގުރޭޑް 1 ގެ ދަރިވަރުންނަށް ކިޔަވައިދޭ ހުރިހައި ޓީޗަރުންނާއި އެކުދިންނާ ސީދާ ގޮތެއްގައި މުޢާމަލާތުކުރަން ޖެހޭ އެކަޑަމިކް މުވައްޒަފުންނެވެ. އެގޮތުން އެކުޖުމުލަ 73 މުވައްޒަފުން ވަނީ މި ދިރާސާގައި ބައިވެރިވެފައެވެ. 1-50 އާ ހަމައަށް ނަންބަރު ޢަދަދުތައް ދިވެހި ބަހުން ބުނަން އެނގޭތޯ ބެލުމަށް ގުރޭޑް އެކެއްގެ ހިސާބު މާއްދާގެ މުގައްރަރާ ފުށުނާރާނެހެން ދަރިވަރުންނަށް ތަފާތު ތިން ޓެސްޓެއް ދިނީމެވެ. ހަމައެހެންމެ، މާދަރީބަހުން ގުނުމުގައި މި ކުދިންނަށް މަދަރުސީ މާހައުލުން ކުރިމަތިވާ ގޮންޖެހުންތައް ދެނެގަތުމަށް، މި ދިރާސާގައި ބައިވެރިވި 73 މުވައްޒަފުންނަށް ސަރވޭފޯމެއް ދެވުނެވެ. ދަރިވަރުން ލައްވާ ހެއްދި ޓެސްޓާއި ސަރވޭ ފޯރމްގެ ނަތީޖާ ސާފުކުރުމަށްފަހު ލިބުނު މަޢުލޫމާތުގެ އެހީގައި މި ދިރާސާގެ ނަތީޖާ ރިޕޯޓްކޮށްފައި ވާނީ ތަފާސްހިސާބާއި ގްރާފް ފަދަ ކުރެހުންތަކުންނެވެ. އެގޮތުން މުޅި މި ދިރާސާ ބިނާވެފައި އޮންނާނީ ކުއަންޓިޓޭޓިވް ޑޭޓާގެ މައްޗަށެވެ. މި ދިރާސާގެ ސަބަބުން ކުދިން ގުނުމާއި ނަންބަރު ލަފުޒު ބޭނުންކުރުމުގައި ބޮޑަށް އިސްކަން ދެނީ ކޮން ބަހަކަށް ކަމާއި ދިވްހި ބަހުން ގުނާށާއި ނަންބަރު ލަފުޒުތައް ބޭނުންކުރާ މިންވަރު ހާމަވިއެވެ. އެގޮތުން އިނގިރޭސި ބަހަކީ ދެވަނަ ބަސް ކަމުގައި ވިޔަސް ގުނާށާއި ނަންބަރު ލަފުޒު ބުނަން ދަރިވަރުން ދަށީ މާދަރީ ބަހުން ކަން ވަނީ ހާމަވެފައެވެ. މީގެއިތުރުން، ފާހަގަކުރެވުނު ގޮތުގައި މާދަރީ ބަހުން ގުނުމުގައި މި ކުދިންނަށް ސްކޫލް މާހައުލުން ކުރިމަތިވާ ގޮންޖެހުންތަކެއް އެބަހުރިކަމާއި އެކަންކަން ގުޅިފައި ވަނީ ސްކޫލް މާހައުލުގައި އެކުދިންނާ މުޢާމަލާތުކުރަން ޖެހޭ ފަރާތްތަކުގެ އިތުރަށް ހިސާބު މާއްދާގައި ގުނުމުގެ ބައި ކިޔަވައިދެވޭ ގޮތާއި ތަޢުލީމްދޭ މީޑިއަމާއެވެ. މި ދިރާސާގެ ސަބަބުން ދިވެހި ބަހުގެ ތެރެއިން ނެތެމުންދާ ހިސާބުގެ ވިޔަޢަދަދުތަކަށް ދިވެހި ބަހުން ބޭނުންކުރާ ދިވެހި ލަފުޒުތައް ދިރުވާ އާލާކުރުމަށާއި އުނގަންނައިދިނުމުގައި މިކަމަށް އިތުރަށް ސަމާލުވާން ޖެހިފައިވާ މިންވަރު ހާމަވިއެވެ. އެހެންކަމުން މިއީ ތަޢުލީމީ ދާއިރާއަށް، ޚާއްޞަކޮށް މުގައްރަރު އެކުލަވާލާ ފަރާތްތަކަށާއި ދިވެހި ބަހަށް މުހިއްމު ދިރާސާއެއް ކަމުގައި ވެސް ފާހަގަކުރެވުނެވެ.