Abstract:
މި ދިރާސާއަކީ، ލަފުޒު ތަކުރާރުކުރުމުގެ (ރީޑުޕްލިކޭޝަންގެ) ނުވަތަ، ނާޒިމް ޢަބްދުއްސައްތާރު (2016) ވިދާޅުވެފައިވާ، "ފަށްފަށްކުރުމުގެ ކިއްސަރު" ގެ އުޞޫލުން ދިވެހިބަހުގައި ލަފުޒު އުފެދިފައި ހުރި ގޮތްތައް ދެނެގަތުމާއެކު، އެ ލަފުޒުތައް ދިވެހިބަހުގައި އަދާކުރާ ދައުރުތައް ބެލުމުގެ މަޤްޞަދުގައި ކުރެވުނު ދިރާސާއެކެވެ. އެ ގޮތުން މި ދިރާސާގައި، ދުނިޔޭގެ ބައެއް ބަސްބަހުން ފެންނަން ހުރި، ލަފުޒު ތަކުރާރުކުރުމުގެ އުޞޫލުތައް ނުވަތަ ވައްތަރުތަކާ އެއްގޮތަށް ދިވެހިބަހުގައި ފެންނަން ހުރި އެފަދަ ލަފުޒުތައް އުފެދިފައިވާ ގޮތް ދެނެގަނެވުނެވެ. ހަމައެހެންމެ އެ ލަފުޒުތައް ޖުމުލައިގައި އަދާކުރާ ދައުރުތައް ނުވަތަ ޖުމުލައިގައި އެ ލަފުޒު ބޭނުންކޮށްފައިވާ ގޮތް ވެސް މި ދިރާސާއިން ދެނެގަނެވުނެވެ.
މި ދިރާސާ ކުރިއަށް ގެންގޮސްފައިވާނީ، ކޮލިޓޭޓިވް އެޕްރޯޗް ބޭނުންކޮށްގެންނެވެ. އަދި މިއީ ޓެކްސްޓް އެނާލިސިސްގެ މައްޗަށް ބިނާކޮށްގެން ހެދިފައިވާ ދިރާސާއެއް ވެސް މެއެވެ. މި ދިރާސާއަށް، ސާމްޕަލްގެ ގޮތުގައި ނަގައިފައިވާނީ ދިވެހިބަހުން ހިންގަމުން އަންނަ ވެބްސައިޓުތަކުގައި ދިވެހިބަހުން ލިޔެ ޝާއިޢުކޮށްފައިވާ ލިޔުންތަކުގެ ތެރެއިން، ލަފުޒު ތަކުރާރުކޮށްގެން އުފައްދައިފައިވާ ލަފުޒު ހިމެނޭ ޖުމުލަތައް އެކަންޏެވެ. އެ ގޮތުން ފައިންޑިންގްސް ބައިގައި ހިމެނި މި ޖުމުލަތައް ދިރާސާކުރުމުން، ދިވެހިބަހުގައި ލަފުޒު ތަކުރާރުކޮށްގެން ލަފުޒުތައް އުފެދިފައިވާ ގޮތް ދެނެގަނެވުނެވެ. އަދި އެ ލަފުޒުތައް އަދާކުރާ ދައުރުތައް ވެސް ދެނެގަނެވުނެވެ. އެއަށްފަހު ފާހަގަވީ ހުރިހާ ކަންކަން ތަފްޞީލުކޮށް ޑިސްކަޝަން ބައިގައި ބަޔާންކޮށްފައި ވާނެއެވެ.