25 އަހަރުގެ ކުރިއެރުމާއި ދިމާވި ގޮންޖެހުންތަކާއި އޭގެ ސަބަބުތައް (2010-1985) : ތ. އަތޮޅުމަދަރުސާ

Abstract

މިއީ ވޭތުވެދިޔަ 25 އަހަރުގެ ތެރޭގައި، ކޮޅުމަޑުލު އަތޮޅު މަދަރުސާއަށް، ލިބިފައިވާ ކުރިއެރުމާއި، ކުރިއެރުން ލިބިފައިވާ ގޮތްތަކާއި، ދިމާވި ގޮންޖެހުންތަކާއި އޭގެ ސަބަބުތައް ދެނެގަތުމަށް ކުރި ދިރާސާއެކެވެ. މި ދިރާސާގައި ތަފާތު ތިންދާއިރާއަކުން ލިބިފައިވާ ކުރިއެރުންތަކާއި ގޮންޖެހުންތަކާއި އޭގެ ސަބަބުތަކަށް ބަލާލެވިފައި ވާނެއެވެ. އތިން ދާއިރާއަކީ އުނގެނުމާއި އުނގަންނައި ދިނުމާއި މެނޭޖުމެންޓާއި ޢުމުރާނިއްޔަތެވެ. މި ދިރާސާއިން ދެއްކި ގޮތުގައި، އުނގެނުމާއި އުނގަންނައިދިނުން ކާމިޔާބުވުމުގެ ސިއްރަކީ، މަޤްޞަދެއް އޮތުމާއި، އެކަށީގެންވާ ވަޞީލަތްތައް ލިބުމާއި، ކަމަށް ޤާބިލް މުދައްރިސުން ލިބުމެވެ. މެނޭޖުމެންޓުގެ ތަރައްޤީގެ ސިއްރަކީ މެނޭޖުމެންޓުގެ އެއް ތިއަރީ ކަމަށްވާ، ނާޒިރުގެ ލީޑަރޝިޕެވެ. މިގޮތުން މީހުން ބިނާކުރުމަށް ދެއްވި އަހައްމިއްޔަތާއި، އިދާރީ ގޮތުން ގެންނެވި ހެޔޮ ބަދަލުތަކެވެ. އަދި ޓީމް ވާރކުގެ ގޮތުގައި މަދަރުސާގެ އެންމެހާ މުވައްޒަފުން މެނޭޖުމެންޓާއި ގުޅިގެން އެކުވެރިކަމާއި އެއްބައިވަންތަކަމުގައި، މަސައްކަތްކުރިކަމީ، އަރުތަ ލިބިގެންދިއުމުގެ އެންމެ ބޮޑު ސިއްރުކަން މި ދިރާސާއިން ދައްކައެވެ. ޢިމްރާނީ ތަރައްޤީއަށް ނަޒަރު ހިންގައިލާއިރު، ފަސް ކިލާސް ރޫމުގެ ޤިމާރާތަކުން ފެށުނު ތ.އަތޮޅު މަދަރުސާގައި އުނގަންނައި ދިނުމަށްޓަކައި، އިތުރު އެގާރަ ކިލާސް ރޫމާއި، ސްޕަވައިޒާރސް ރޫމާއި ސްޓާފް ރޫމެއްގެ އިތުރުން، ސައިންސް ލެބަކާއި ކޮމްޕިއުޓަރ ލެބަކާއި ލައިބްރަރީއެއް ބިނާކުރެވިފައި ވެއެވެ. މިއީ ޢިމްރާނީ ގޮތުން މަދަރުސާއަށް ލިބިގެންދިޔަ ރަނގަޅު ކުރިއެރުމެވެ. މިކަމުގެ ކާމިޔާބީގެ ފަހަތުގައި، މަދަރުސާގެ މުވައްޒަފުންނާއި ވަކިން ޚާއްޞަގޮތެއްގައި ބެލެނިވެރިންގެ މަތިވެރި ޤުރުބާނީ ފާހަގަކޮށްލަން ޖެހެއެވެ.